<Snarq wItu'laHmeH pupbej Daqvam!> jach 'InpIn beqDaj Qorghbogh SaqmoHtaHvIS.
bIQ'a' HeHDaq chaH HuSmoHlI'meH nItlhDaj tIn
jIbchaj 'uchtaH bIH vaj SaHnIS.
<Snarq wItu'laHmeH pupbej Daqvam!> cha'logh ja'. <beqwIj tungHa' ta'Homvam neH.
<Snarq wItu'laHmeH pupbej Daqvam!> wejlogh ta'.
<wejlogh Doch vImaqta'chugh, teH.>
naQchu' beq. DaS chenmoHwI' ngaS lengrupbogh ghom. mIv pogh je tI'wI' vIDellI'.
chutmey noHwI' luqem, ghaytan ghoHmo' ghomHom.
popchaj chovlaHmeH tlhej chelwI'.
po'qu' qa'vaQ Qujchu'wI'. chaq Qujpu'DI' Hoch, popDaj tIn law' Hoch tIn puS. 'ach
Hoch Huch QorghtaH Huch QorghwI' luDIlta'bogh qoch.
meqvammo' DuHbe' SuDtaHghach.
chemvaH tu'lu' je. ravDaq yIttaHqu' Saj tIS. rut 'etDaq ba' 'ej SIrgh Qatlh bagh.
'InpIn ja' <pIj nutoDta' maHeghbeHtaHvIS.>
'chay' ta' 'oH? wejpuH, janglaH pagh.
noychoH wa' nuv. noy ghaH Dochmey law'qu' lIjmo', Duj tIjruptaHvIS lIjwI' tam.
cheSvelDaj, tlhaqDaj, nachbochDaj, QebmeyDaj ngo',
Hoch SutDaj je lIjpu' loDvam.
loSmaH cha' ngaSwI' ghaj ghaH. bIH ghoDmeH yeppu'. Hoch ngaSwI'Daq pongDaj ghItlhta'.
'ach pagh ja'mo' ghaH, ngoDvam Sov pagh. ramba' ghu':
tlheDDI' puHDaq ratlhtaH tepna'.
SutDaj chIlpu'mo, potlhbe' 'ej SaHnISbe' ghaH. Soch cheSvel tuQtaH tIjtaHvIS.
jav DaS tuQtaH je ghaH, 'ach ramqu'bejtaH 'aH:
pong'e' lIjchu'pu' nuvvam mIS!
jangqang <nuqneH> rI'lu'DI' pagh jachchoHDI' vay': <jIbwIj yImIQ> pagh <'eH HIwaH>.
Qap je <chay' ponglu'> <nuq 'oH pongDaj'e'> ghap jay'.
'ach Qapchu'qu' <tu'HomI'raH>.
permeH mu' HoS lumaSlaw'bogh latlh tu'lu'chugh, pongmey pIm Qoy'DI' jangrup ghaH.
pongta'meH jupoypu'Daj pIj jatlhpu' <weQHugh>,
ghaHvaD jatlh jaghpu'Daj <tlhImqaH>.
<toH, 'IHHa'qu'ba' porgh 'ej valHa'qu'ba' yab> (pIj Dochmeyvam maqtaH 'InpIn)
<'ach pupchu'bej toDujDaj, vaj chon chutmey pab:
Snarq wammeH 'utbej toDuj tIn.>
Qa'mey toj ghaH. mInchaj bejqu'taH mInDaj qu' chIch Qobna' buSHa'chu'taHvIS.
wa'logh mIl'oD mamwech 'uch yIttaHvIS juppu'.
<'oH vIQuchmoHlI'meH neH> DIS.
vutwI' gheSmeH muvta', 'ach paSqu'DI' vay' chID. tlhoS 'InpIn may'moH De'Daj qab.
tlhoghchab neH vutlaH ghaH, 'ach vutta' not 'e' nID,
Dachmo' jomey qItbe' tlhoghchab.
beqvam QavwI' qelnISlu'chu' potlhbejmo' ghaH. QIpwI'Hey DataH, 'ach ram ngoD.
wa' qech neH ghajtaH ghaH, 'ach Snarq'e' buSqu'taH.
SIbI' buSqu'wI' muvmoH HoD.
Ha'DIbaH HoHmeH muvta, 'ach lengtaHvIS tam. qaSDI' wa' Hogh, vay' maq HoHwI'.
<chemvaH neH vIHoHlaH> ja'. 'InpIn ghIj De'vam.
ghIjqu'mo' tlhoS jatlhlaHbe'lI'.
<DujvamDaq wa' chemvaH neH tu'lu' 'e' DaSov.> QIt ja' joqlaw'taHvIS ghoghDaj.
<SajwIj 'oH chemvaHvam'e'. qu'be'chu' net ghov.
<jI'IQchoHbej jIH Heghchugh Saj.>
Doch maqbogh HoHwI'qoq QoyDI' chemvaH, SaQchoH. SaQtaHvIS morgh 'ej jotHa'ba'.
Snarq wam 'e' tIvbej chemvaH, 'ach yapbe' popvam
HoHwI' ja'nISchugh <choHoHta'.>
Duj cha'DIchDaq lIghnIS HoHwI' 'e' chup chemvaH. pe'vIl qeS 'oH. tlhoS jachtaH 'oH.
lajQo' 'InpIn. paytaHvIS chemvaHvaD QoStaH.
leng nabta' 'InpIn 'ej not choH.
reH Qatlh chIjwI' Qu'na' net Sov. reH Qu'Daj buS. wa' Dujmo', wa' 'Inmo' je Qatlh.
cha' Duj chermeH ta' Qatlh law' wa' Duj neH Qatlh puS.
<Do'Ha' rapnIStaH ghu'vam> jatlh.
yoD DalaHbogh yIvbeH'e' SuqnISbej chemvaH. 'oHvaD nabvam chupta' vutwI'.
chupta' latlh: HeghmoHchugh vay', yInwI'pu' QaHlaH
San ghItlh DIlbogh, vaj qI'nISlI'.
nabvam cha'DIch chup Huch QorghwI'. San ghItlh ngevrup. pagh wa' nojrupmeH Huch tlhapqang.
cha' ghItlh qeltaH ghaH: qul buSbogh wa' je' 'e' chup.
chal chuch buSlaw'bogh latlh'e' 'ang.
'ach DaH qaSpu'mo' jajvetlh wanI'mey 'IQqu', SumlI'chugh Ha'DIbaH HoHwI',
lurgh pIm bejlaw'taH chemvaH bItmoHtaHvIS ghu'.
jatlhlaw'Qo' 'oH 'ej yeplaw'lI'.
|
bommey >